Á þessu svæði eru staðsettir sérstakir einingakubbar til þess að byggja úr (Unit blocks). Í kubbaleik bjóðast barninu ýmsir félagslegir kostir. Það getur byggt eitt eða unnið með öðrum, verið hluti af litlum hóp innan stærri hóps o.s.frv. Það rannsakar efniviðinn og kannar notkunarmöguleika hans. Börnin læra flokkun og hugtök, hver kubbur hefur ákveðna stærð, þykkt, lengd og breidd. Margvíslegir eiginleikar kubbanna stuðla að því að börn kynnast möguleikum þeirra. Þetta er undirstaða stærðfræðiþekkingar.

Þar sem deildirnar eru aldursblandaðar gefur hópastarfið okkur aukið tækifæri til þess að halda utan um ákveðna þroskaþætti hjá börnunum. Stærð hópa er mismunandi frá ári til árs. Í yngri hópunum eru 5 – 8 börn og einn starfsmaður en í elsta hópnum eru allt að 16 börn og eru þá tveir leikskólakennarar með hann. Hver hópur er nefndur eftir ákveðnum lit en ekki aldri barnanna. Gerir það okkur auðveldara að finna hóp sem hæfir hverju barni hvað varðar þroska, óháð fæðingarári. Að öðru leyti er Guli hópurinn fyrir tveggja ára börn, Rauði hópurinn þriggja ára, Græni hópurinn fjögurra ára og Appelsínuguli hópurinn fimm ára. Öll börn fá tónlist og hreyfistund einu sinni í viku. Elstu börnin fá verkefnastund tvisvar í viku og þau næst elstu einu sinni í viku.