Kæru foreldrar og börn

Nú styttist óðum í sumarfríið okkar og vonandi eigum við öll langa og sólríka sumardaga í vændum.

Að njóta og upplifa

Ef þið eigið leið um fjörur, holt og hæðir eða hvar sem þið eruð að njóta og upplifa langar okkur að biðja ykkur um að hvetja barnið ykkar til að safna nokkrum steinum, skeljum eða einhverju öðru og koma með í leikskólann eftir frí. Það væri líka frábært að fá mynd af barninu og staðnum og ekki myndi nú skemma fyrir að fá litla frásögn með. Þetta er svo góð og eftirsóknarverð leið til að auðga grænfánaverkefnið okkar og eykur fjölbreytni og skemmtilegheit í leikskólastarfinu. Við viljum alls ekki að þetta verði nein fyrirhöfn, bara að nota augnablikið þegar þið eruð einhvers staðar úti við.

Við þurfum að nýta okkur undrun barnsins.

Með góðum sumarkveðjum frá starfsfólkinu í Hálsakoti.

Jónsmessuhátíð

Hálsakot tekur þátt í Jónsmessuhátíð þriggja leikskóla föstudaginn 19. júní sem haldin verður í leikskólanum Steinahlíð ásamt leikskólanum Fálkaborg. Þá ætla börn og starfsfólk Gleym mér ei-  leikskólanna en það eru samtök leikskóla í Reykjavík sem hafa leyfi til að flagga Grænfánanum að hittast í garðinum í Steinahlíð og eiga saman góðan dag. Við förum í leiki, syngjum saman og grillum. Hátíðin verður frá kl.10:00 - 14:00. Börnin sem fædd eru 2003 - 2004 taka þátt i hátíðinni og fara með rútu frá Hálsakoti.